Дүниежүзілік додада барлығы 16 құрама сынға түседі. Олар А және В тобына сегіз-сегізден бөлінген.
А тобында АҚШ, Швейцария, Финляндия, Аустрия, Латвия, Германия, Ұлыбритания, Венгрия шеберлік байқасса, В тобында Канада, Швеция, Италия, Дания, Чехия, Словакия, Норвегия және Словения мұзайдынға шығады.
17 мамырға белгіленген ойындардың бірінде А тобында Аустрия құрамасы Венгрияны 4:2 есебімен тізе бүктіріп, екінші жеңісіне қол жеткізді. Олар бірінші турда Ұлыбританияны 5:2 есебімен қапы қалдырған еді. Нәтижесінде турнир кестесінде аустриялық хоккейшілер 6 ұпаймен көш басында келеді.
Сондай-ақ бұл топта 17 мамырда АҚШ құрамасы Ұлыбританиядан 5:1 есебімен басым түсті.
Ал В тобында Словакия құрамасы Италияны 4:1, Швеция құрамасы Данияны 6:2 есебімен тізе бүктірді.
Дәл қазір А тобында Германия - Латвия, В тобында Норвегия - Словения кездесуі өтіп жатыр.
Қазірге дейін Канада - 28 Ресей (КСРО) - 27, Чехия (Чехословакия)- 13, Швеция - 11, Финляндия - 4, АҚШ - 2, Ұлыбритания мен Словакия -1 мәрте чемпиондық тұғырға көтерілді.
Айта кетсек, биыл Польшаның Сосновец қаласында өтіп жатқан I дивизионның әлем чемпионатында Қазақстанның ерлер құрамасы Украинаны жеңіп, мерзімінен бұрын элиталық дивизионға жолдама алды.