Ауыл шаруашылығы құрылымдарын қаржылай оңалту тетіктері талқыланды - Ақмола облысы

КӨКШЕТАУ. ҚазАқпарат - Ақмола облысының әкімі Мәлік Мырзалиннің төрағалығымен «Әліби» компания тобының проблемалық мәселесі бойынша штаб отырысы болып өтті, деп хабарлайды ҚазАқпарат тілшісі облыс әкімдігінің баспасөз қызметіне сілтеме жасап.

Шараға ҚР Ауыл шаруашылығы вице-министрі Берік Бейсенғалиев, «Азық-түлік корпорациясы» Ұлттық компаниясы» АҚ, «ҚазАгроГарант» АҚ, «Аграрлық кредиттік корпорациясы» АҚ, «ҚазАгро» Холдинг» АҚ басшылары, аудан әкімдері, салалық ммлекеттік органдар мен қаржы институттары, «Әліби» компания тобына кіретін 11 ауыл шаруашылығы құрылымының директорлары қатысты.

«Мемлекет басшысының тапсырмасы шеңберінде еліміздегі проблемалы агрохолдингтерде қаржылық тәртіпті ретке келтіру бойынша Ақмола облысында несиелік тәуекелді талдау, қаржы институттары алдында борыш құрылымын қайта қарау жұмыстары жүргізілуде. Сондай-ақ, бірқатар ауыл шаруашылығы құрылымдарын оңалту процесі іске қосылды»,- деді өз сөзінде Мәлік Мырзалин.

Сонымен қатар, аймақ басшысы «Әліби» компания тобына кіретін ауыл шаруашылығы құрылымының активтерін түгендеу бүгінгі күннің басты міндеті екенін атап өтті. Келесі кезекте шаруашылық субъектілерін қаржылық оңалту және қажылық талдау ісі қолға алынбақ.

Аталмыш ауыл шаруашылығы кәсіпорындары орналасқан аудандардың әкімдері мен құзырлы мемлекеттік органдардың басшыларына көктемгі дала жұмыстарына дайындалу туралы тапсырма берілді.

«Бізге көктемгі дала жұмыстарын сапалы жүргізу үшін тиісті шараларды уақтылы қолға алу қажет. Жанар-жағармай мен өзге де тауарлы-материалдық құндылықтар сатып алу үшін қаржыландыруға қолжетімді болуы, кадрлық әлеуетті ұстап тұруды, еңбеккерлерге жалақыны уақытында төлеуді қамтамасыз ету керек», - деді аймақ басшысы.