Қытайдың Ханчжоу қаласында өтіп жатқан Азия ойындарында әйелдер күресінен Жәмила Бақбергенова (76 келі) финалға шықты, деп хабарлайды ҚазАқпарат тілшісі.
Қазақстандық балуан алғашқы айналымда Светлана Окназарованы (Өзбекстан) 7:0есебімен жеңсе, одан кейін Ариунжаргал Ганбатты (Моңғолия) 6:0 есебімен тізе бүктірді.
Ал 1/2 финалда Үндістан балуаны Киранды 4:2 есебімен ұтты.
Ол финалда әлем чемпионатының 2 мәрте жүлдегері Айпері Медетқызымен (Қырғыз Республикасы) белдеседі.
Жәмила Бақбергенова 1996 жылы 6 қаңтарда дүниеге келген. Ересектер арасында 2021 жылы Норвегия астанасы Осло қаласында өткен әлем чемпионатында күміс жүлдегер атанған болатын.
Ол Азия чемпионатында 2020, 2022 жылдарда чемпион атанса, 2021 жылы күміс, 2019 жылы қола алды.
Еске салсақ, бұдан бұрын джиу-джитсуден Нұржан Батырбеков Азия ойындарының чемпионы атанды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.