Елде жылдық инфляция баяулап, 15,9% болды (сәуірде – 16,8%). Аймақтар бойынша инфляция барлық 19 өңірде бәсеңдеді. Ал, Ақмола облысында бұрынғы 17,6% деңгейіндегі мәнін сақтай отырып, өзгерген жоқ.
Жылдық инфляцияның ең жоғары мәні Ақмола, Маңғыстау және Солтүстік Қазақстан облыстарында тіркелді.
Азық-түлік тауарларының бағасы ж/ж 16,5%-ға дейін (сәуірде – 17,9%) баяулады. Осы топтағы тауарлардың бағасы Маңғыстау облысында (20,7%) барынша жоғары, ал Алматы қаласында (14,3%) мейлінше төмен өсті.
Азық-түлікке жатпайтын тауарлар бағасының өсу қарқыны ж/ж 17,2%-ға дейін баяулады (сәуірде – 18,2%). Ең жоғары мән Астана қаласында (23,6%), ең төмен мән Алматы облысында (14,1%) тіркелді.
Ақылы көрсетілетін қызмет бағасы ж/ж 13,5%-ға дейін баяулады (сәуірде – 13,7%). Бұл ретте жалпы республикалық деңгейден баға Ақмола облысында (18,1%) біршама жоғары, Астана қаласында (10,2%) айтарлықтай төмен өсті.
Елдегі айлық инфляция 0,6%-ға өсті. Бұл – тарихи орташа мәннен (2017-2021 жылдары мамырда – 0,5%) жоғары.