ОРАЛ. 26 қаңтар. ҚазАқпарат /Елжан Ералы/ - Қазақстан қалаларын аралап жүрген Азиада алауы 17 қаңтар күні Оралға жеткізілген болатын. Дәл сол күні Қаратөбе ауданының тұрғыны Айбарша Орынбасарованы толғақ қысқан.
Алғашқы барғанда толғағы жеңіл болып, облыс орталығындағы перзентхана дәрігерлері қайтарып жібереді. Сол күні кешкісін екінші қайтара перзентхана есігін ашқанда, ананы ақ желеңді жандар қабылдап, дәрігерлік көмек көрсетеді.
Сәбиге жарық дүние сыйламақ болып қиналған Айбарша Орынбасарова 18 қаңтарға қараған түні сағат тілі түнгі үшті соққанда өмірге шекесі торсықтай ұл әкелді. 18 қаңтар күні Азиада алауын облыс әкімі Бақтықожа Ізмұхамбетов бастап қала көшелерімен алып өткені белгілі.
Азиада алауымен жарысып, өмір есігін ашқан «атқамінерге» Жеңіс Орынбасаровтың (баланың әкесі) құрдастары «Алаубек» деп ат қояды. Қуаныштан төбесі көкке жеткен Жеңістің айтуынша, Азиада құрметіне орай және «Бек» деген жалғау қазақта сұлтан, басшы деген мағынаны білдіргендіктен, ұлына Алаубек деген ат берілді.
Алаубек - Жеңіс пен Айбаршаның бір ұл, үш қыздан кейінгі бесінші баласы.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).