АСТАНА. KAZINFORM - Шымкентте өтіп жатқан Азия чемпионатында Қазақстан құрамасы стенд атудан күміс медаль алды.
Ел құрамасынан Эдуард Ещенко мен Анастасия Молчанова аралас командалар арасындағы «скит» бағдарламасында екінші орын иеленді.
Бұл сында алтын медаль Қытай жұбына бұйырса, үшінші орынға Қатар мен Үндістан тұрақтады.
Айта кетсек, бұған дейін Молчанова жекелей сайыста қола жүлдегер атанған еді.
Ұлттық құрама ойыншысы жарыс барысында 45 ұпай жинап, үздік үштікті түйіндеді.
Құрлықтық додаға 29 елден 756 спортшы келді. Олар екі аптаға жуық уақыт бойы жүлделерді сарапқа салады.
Шымкент қаласы төрт жыл бұрын пневматикалық қарумен нысана көздеуден Азия чемпионатын қабылдаған еді. Онда 20 мемлекеттің 350-ге жуық спортшысы қатысты.
Қазақстан 5 алтын, 7 күміс және 6 қола медальмен жалпы есепте 1-орын алды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.