АСТАНА. KAZINFORM - Иордания астанасы Амман қаласында өтіп жатқан Азия чемпионатында грек-рим күресінен тағы үш отандасымыз қола жүлде үшін белдеседі.
Ел құрамасынан Ербол Қамалиев (55 келі) ¼ финалда Ирак балуанына есе жіберді. Жұбаныш белдесуінде жеңіске жеткен ол енді қола жүлдені өзбекстандық балуанмен сарапқа салады.
Қазақстандық тағы бір балуан Ибрагим Магомадов (77 келі) бірінші белдесуінде оңтүстіккореялық балуанды жеңді. Одан кейін Өзбекстан балуаны Адам Варданянға есе жіберді. Енді Ибрагим үшінші орын үшін Иордания балуанымен бозкілемге шығады.
Ел құрамасынан Шамиль Ожаев (87 келі) ширек финалда қырғызстандық спортшыны тізе бүктірді. Ал жартылай финалда өзбекстандық балуаннан жеңіліп қалды. Алдағы белдесуде ол Оңтүстік Кореядан келген спортшымен шеберлік байқасады.
Айта кетсек, бұдан бұрын Сұлтан Әсетұлы (63 келі) қола медальға таласатынын хабарлаған едік.
Сондай-ақ Әлімхан Сыздықов Азия чемпионатының алтын медалі үшін күреседі.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.