НҰР-СҰЛТАН. ҚазАқпарат - Ел астанасы - Нұр-Сұлтан қаласында өтіп жатқан күрес түрлерінен кадеттер арасындағы Азия біріншілігінде еркін күрестен біздің қоржынға үш жүлде түсті, деп хабарлайды ҚазАқпарат тілшісі.
Боз кілемге шыққан үш балуан да жүлдегерлер қатарынан көрінді. Дүбірлі додада 80 келіде сынға түскен Бекзат Аманғали финалға дейін жетті. Соңғы сәтте қарсыласына есе жіберіп, күміс жүлдегер атанды. Ал Олжас Олжақанов (65 келі) және Нұрдәулет Қуанышбай (71 келі) қола жүлдені қоржынға салды.
Бұдан бұрын елордада өтіп жатқан Азия чемпионатында грек-рим күрес шеберлері үш медаль алғанын хабарлаған едік.
Айта кетерлігі, аталмыш жарыста Азия құрлығының 14-16 жас аралығындағы жасөспірімдері бақ сынап жатыр. Дүбірлі додаға сарықұрлықтың 19 мемлекетінен 300-ден астам балуан келді. Біздің еліміздің күрес түрлерінен құрамалар сапында 30 балуан бар.
Биыл 14-22 қыркүйекте Нұр-Сұлтан қаласында күрес түрлерінен әлем чемпионаты жалауын көтереді. Онда грек-рим, еркін, әйелдер күресі және грэпплинг шеберлері жиналады.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.