ОРАЛ. 22 қаңтар. ҚазАқпарат /Елжан Ералы/ - Допты хоккейден Ресей чемпионаты бірінші лигасында өнер көрсететін Оралдың «Ақжайығы» кезекті кездесулерін Самара қаласында жергілікті ЦСК ВВС командасымен өткізеді.
Осында үш матч өткізгеннен кейін «Ақжайық» алғашқы айналымды аяқтайды. Әзірге батысқазақстандықтар «Б» тобында 22 ұпаймен екінші орында (Саратовтың «Универсалы» 28 ұпаймен көш басында). Осының алдында өз айдынында Ульяновскінің «Волга-2» командасын 5:2, 4:2 есебімен екі рет ұтқан «Ақжайық» турнир кестесіндегі өз жағдайын жақсарта түскен болатын.
Қазан қаласында 23 қаңтарда басталатын допты хоккейден әлем чемпионатында Қазақстан құрамасы сапында «Ақжайықтан» үш бірдей ойыншы (Владислав Новожилов, Ескендір Нұғманов, Петр Грибанов) айдынға шықпақ. Одан кейін Алматыда түгелдей «Ақжайық» хоккейшілерінен құралған Қазақстан құрамасы тұңғыш рет Азия ойындарына қатысады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).