«Бақырып басшы бола ма?» - баспасөзге шолу
***
«Егемен Қазақстан» газетінің жазуынша, еліміздегі ең жаңа, экологиялық тұрғыдан таза, ең қауіпсіз әрі көркем стансалары бар қоғамдық көліктің түрі Алматы метросы болып отыр. Кеше алматылық метро ESQR-дың (Сапаны зерттеудің Еуропалық қауымдастығы) «Platinum» категориясындағы кубогы мен дипломына ие болды. Осылайша кезекті рет еліміздегі ең жас метро дизайны жағынан әлемдегі ең әдемі, ең сапалы метрополитендердің қатарына көтерілді. Бұған дейін де алматылық жерасты көлігі биылғы шілде мен желтоқсан айларында «Сапаны үздік пайдаланудың Еуропалық марапаты номинациясы бойынша екі рет жүлдегер атанған болатын. Бұл материал «Алматы метросы еуропалық марапатқа ие болды» деген тақырыппен жарияланды.
Бас басылымда «Бақырып басшы бола ма?» деген мақала берілген. Қазақта бұрыннан: «Бай болған бақырып бола ма?» деген сөз бар. Ал бүгінгі Ақтаудағы бастықтар сол бақыруға балағатты қосып жібереді екен. Ал екеуі қосылып кеп кеткенде, оның алдында отырған қарауындағы жұмысшылары ғана емес, кәрі Каспийдің өзі тітіркеніп кетеді деседі. Міне, осылайша үстеріне әңгіртаяқ ойнай беруінен әбден зәрезап болған қаладағы сондай мекемелердің бірі - коммуналдық шаруашылық бөлімінің қызметкерлері ақыры тәуекелге барып, бастықтарының үстінен прокуратураға шағыныпты. Ақтауда коммуналдық шаруашылық бөлімінің бастығы қарамағындағыларға күн көрсетпей, бас-көз демей балағаттайды екен. Одан әбден мезі болған қызметкерлер ақыры прокуратураға шағым түсіріпті. Айтуларынша, Сағынғали Амангелдиев мемлекеттік қызметкердің ар-намысын аяққа таптап, бөлімдегілермен боқтап қана сөйлескен.
***
«Айқын» газетінің жазуынша, алдағы жаңа жылда Қазақстанда қос бірдей ұлттық компания жаңадан құрылуы мүмкін. Қоршаған орта және су ресурстары министрлігі Үкіметке осындай ұсыныспен шықты. Министрлер кабинеті кешегі отырысында «Су ресурстарын басқару жөніндегі мемлекеттік бағдарлама» жобасын құптады. Бұл - ел Үкіметінің биылғы жылжабар жиыны болатын. «2013 жыл оңай болған жоқ» деп бағалады жылды қорытқан Премьер Серік Ахметов. Серік Нығметұлының мәліметінше, биылғы жылы ел Үкіметі 80 заң жобасын әзірлепті, олар ендігі қабылданған. Былтыр бұл ауқым 55-ті ғана құраған екен. Үкімет басшысы «әкімдердің, министрлердің, барлық басшылардың үлкен жұмыс тындырғандығын» айтты.
- 2014 жыл да қарапайым болмайды деп күтілуде, - деді Серік Ахметов. - 2013 жылы жинақтай алған базамыз 2014 жылы да табыспен ілгерілетіледі деген ойдамын.
Болашағын билікпен байланыстыратын бірқатар тұлғаларға жаңа жыл жаңа мүмкіндіктер беруі мүмкін. Мысалға, екі министрлік жанынан екі ұлттық компания жұмысын бастайды деп тұспалдануда. Экология министрі Нұрлан Қаппаровтың сендіруінше, бұлар «магистральдық және таратушы су инфрақұрылымын басқару үшін» қажет. Әйтпесе, бұған министрліктің жалғыз өзінің мұршасы келмей жатқан көрінеді. Бұл мақала «Екі ұлттық компания құрылуы мүмкін» деген тақырыппен басылды.
Осы басылымда «Сырттағы қазаққа салғырт қарамайық» атты мақала көпшілік назарына ұсынылып отыр. Қазақ қоғамындағы түйткілді мәселелердің бірі - оралмандар тірлігі. Сонау 1991 жылы желтоқсанда еліміз тәуелсіздік алған соң араға бірер апта салып, Елбасы сырттағы қазаққа «Дүниежүзiндегi қазақтың жалғыз отаны - Қазақстан» деп сауын айтты. Атамекенге оралғысы келетіндерге есік ашық екенін ескертті. Содан бергі кезеңде атамекенге 1 миллионға тақау қазақ бет бұрды. Туған елмен қауышты. «Бір қарағанда, бәрі жақсы, бәрі оңды. Алайда шешілмей жатқан тірлік көп. «Қазақтың санын қалай көбейтеміз, өз жерімізде басымдыққа қалай ие боламыз, салт-дәстүрімізді қалай сақтап қаламыз, тілімізді өз тұғырына қалай қоямыз» деп бас қатырамыз. Сөйте тұра, қазақтың көбеюіне үлкен үлес қосатын оралмандарды ұмытамыз, сөйте тұра, қазақтың салт-дәстүрін, әдет-ғұрпын, тілдік нәрін керемет сақтаған қандастарымызды (оралмандарды) өзекке тебеміз, сыртқа итереміз. Тіпті белгісіз себептермен «Нұрлы көш» деген керемет аталған көшке 2015 жылға дейін мораторий жариялап жібердік. Ол аздай жақында сырттан келген қазақтар (оралмандар) 4 жылдан кейін ғана азаматтық алады деген заң шығарып қойдық. Бұл да шекара асып келетін қандастарымыз үшін үлкен тосқауыл болмақ»,-деп жазады мақала авторы.
***
«Егемен Қазақстан» Қазақстан басшысының Ресей астанасына жұмыс сапары аясында Мәскеудегі Жазушылардың орталық үйінде отандық «Елбасы жолы» фильмінің тұсаукесері өтті. Өнер туындысын тамашалауға келген 500-ге тарта көрерменнің арасында Ресей үкіметінің мүшелері, Мемлекеттік Дума депутаттары, белгілі режиссерлер мен актерлер, танымал сарапшылар, сондай-ақ, студенттер болды.
Фильм көрермен назарына ұсынылмастан бұрын, Қазақстанның Ресей Федерациясындағы Төтенше және өкілетті елшісінің кеңесшісі Виктор Темірбаев сөз алып, қазақ киноиндустриясының жаңа туындысын көруге уақыт тауып келгендері үшін жиналғандарға алғысын білдірді. «Мен елшілік басшылығы атынан бүгінгі шараны ұйымдастырушыларға, Жазушылардың орталық үйіне, әсіресе, авторлық ұжымға және осы фильмді тамашалауға жиылған қауымға ризашылығымды білдіргім келеді. Бұл фильм, әсіресе, жастарға тұлғаның қалыптасу жолы қалай жүретіні жөнінде үлкен сабақ болады деп ойлаймын», деді елшінің кеңесшісі өзінің сөзінде. Бұл мақала «Елбасы жолы» - Мәскеуде» деген тақырыппен берілген.