Балалардың терезеден құлауы алаңдатады – Астана әкімдігі

АСТАНА. KAZINFORM — Елордада балалардың терезеден құлауының алдын алу және болдырмау жұмыстары жалғасып жатыр. Бұл туралы елорда әкімдігі мәлім етті.

Төтенше жағдайлар департаменті ювеналдық полиция қызметкерлері, учаскелік инспекторлар сондай-ақ еріктілер жұмылып, бірге түсіндіру жұмыстарын атқарды. 

— Елордадағы 40-тан астам балабақшада балалардың терезеден құлап кетуіне жол бермеу мақсатында ақпараттық-түсіндіру және алдын алу шаралары жүргізіліп, тұрмыстық қауіпсіздік бойынша сабақтар ойын түрінде ұйымдастырылды. Ата-аналармен де түсіндіру жұмыстары жүргізілді, — делінген хабарламада.

Балалардың жарақат алу жағдайларын азайтудың негізгі қауіпсіздік ережелері:

— үйде кішкентай бала болса, терезені ашық қалдырмаңыз, өйткені бұл баланың өміріндегі соңғы сәтке айналуы немесе оны мәңгілік мүгедек етуі мүмкін, оған бірнеше секунд жеткілікті; 

— балаларды қараусыз қалдырмаңыз, әсіресе терезелер мен шыны есіктердің жанында ойнаған кезде;

— тиісті терезе қорғанысынсыз москит торларын пайдаланбаңыз

— балалар оған сүйенгенді ұнатады, оларды сенімді тірек ретінде қабылдап құлап кетуі мүмкін;

— балалардың терезені өздігінен ашуына жол бермеу үшін терезелерге қауіпсіздік құлыптарын (блокаторларды) орнату;

— бала терезеге шықпас үшін жиһазды терезеге жақын қоймаңыз.

Еске сала кетейік, бұған дейін Қызылорда облысында былтыр 17 бала терезеден құлап кеткенін жазған болатынбыз.