Балалары түнгі уақытта далада жүргені үшін 60 ата-ана жауапқа тартылды
Аталған кешенді шараға ішкі істер органдарының жеке құрамы, жергілікті атқарушы билік, прокуратура, білім беру, денсаулық сақтау органдарының, сондай-ақ «Нұр Отан» партиясының жастар қанаты филиалы өкілдері қатысуда. Олар алкогольді ішімдіктер ішетін, заңды өкілдерінің ілесіп жүруінсіз түнгі мезгілде немесе сабақ уақытында тыйым салынған орындарды жағалайтын кәмелетке толмағандарды анықтаумен, мектептер мен лицей оқушыларына теріс криминогендік ықпалы бар, оларды бопсалаумен айналысатын адамдарды іздеп-табумен, сондай-ақ есірткі және психотроптық заттарды тұтыну фактілерін анықтаумен айналысуда.
Іс-шараның бір күнінде ішкі істер органдарына барлығы 79 жасөспірім жеткізілді. Олардың 6-ауы қаңғыбастыққа салынғаны үшін жеткізілсе, 73-і түрлі деңгейдегі әкімшілік құқық бұзушылықтар жасаған. ҚР Әкімшілік құқық бұзушылық туралы кодексінің 127-бабы бойынша, яғни ата-ананың немесе басқа да заңды өкілдердің балаларды тәрбиелеу жөніндегі міндеттерді орындамағаны үшін 4 ата-анаға және ҚР Әкімшілік құқық бұзушылық туралы кодексінің 442-бабы бойынша, сағат 22.00-ден 06.00-ге дейінгі уақытта заңды өкілдерінің еріп жүруінсіз ойын-сауық мекемелерінде болуы және сағат 23.00-ден 06.00-ге дейін заңды өкілдерінің еріп жүруінсіз тұрғын-жайдан тыс жерде болғаны үшін кәмелетке толмаған 60 бала анықталып, олардың ата-аналарына немесе заңды өкілдеріне әкімшілік шара қолданылды. Сондай-ақ, 7 жасөспірім мен олардың заңды өкілдеріне хаттамалар толтырылды. Осындай хаттама кәмелетке толмағандарға ойын-сауық мекемесіне заңды өкілінсіз кіруіне жол бергені үшін 1 ойын-сауық мекемесінің меңгерушісіне берілді.
Сонымен қатар, іс-шара барысында ішкі істер органдарының тізімдік және профилактикалық есебіне 12 жеткіншек, 7 қолайсыз отбасы есепке алынды.