Баламен араласуға қатысты туыстар арасындағы дауды қорғаншылық органы шешеді

АСТАНА. KAZINFORM — Оқу-ағарту министрі 2025 жылғы 31 наурыздағы бұйрығымен баламен қарым-қатынас құқығы бойынша дауды шешу қағидаларын бекітті.

Аталған қағидалар ата-анасынан, бөлек тұратын атасы мен әжесінің, аға-інілері мен апа-қарындастарының баламен араласу құқығын реттеуге бағытталған.

— Баламен қарым-қатынас орнатуға қатысты дау баланың тұрғылықты жері бойынша қорғаншылық немесе қамқоршылық функцияларын жүзеге асыратын органмен шешіледі, — делінген бұйрықта.

Дауды шешу үшін ата-анасымен қатар бөлек тұратын атасы мен әжесі, аға-інілері мен апа-қарындастары (өтініш беруші) қорғаншылық органына келесі құжаттарды қоса тіркеп, өтініш береді:

— өтініш берушінің жеке куәлігінің көшірмесі;
— наркологиялық және психиатриялық диспансерде есепте жоқтығы туралы анықтама;
— соттылықтың бар-жоғы туралы анықтама;
— тұрғын үйге меншік құқығын немесе оны пайдалану құқығын растайтын құжаттардың көшірмесі.

Дауды қарау өтініш берушінің және баламен бірге тұратын ата-ананың қатысуымен жүзеге асырылады. Сонымен қатар, 10 жасқа толған баланың өтініш берушімен араласу туралы пікірі ескеріледі.

Баламен қарым-қатынас шарттары анықталғаннан кейін, сондай-ақ тұрмыстық жағдайды тексеру нәтижелері бойынша (қажет болған жағдайда), қорғаншылық органы дау бойынша шешім шығарады. Дауды шешу туралы өтініш 15 жұмыс күнінің ішінде қаралады. 

Айта кетсек, таяуда Премьер-министр Олжас Бектенов Сенат депутаттарының сауалына орай жетім балаларды асырап алу рәсімін жеңілдету бағытында қандай шаралар қолға алынғанын айтқан еді.

Еске сала кетсек, елімізде биыл шілдеден бастап баланы қабылдаушы кәсіби отбасы енгізіледі.