Балық шаруашылығындағы шектеулер мен тыйым салуларды реттейтін нормативтік құқықтық акті уақытылы қабылданса игі - С. Еңсегенов
Депутаттың пікірінше, еліміз үшін балық шаруашылығын дамыту аса маңызды болса, соның ішінде, дәстүрлі түрде балық аулау және өңдеумен айналысатын негізгі өңірдің бірі Атырау облысы болып табылады. Бұл ретте биылғы жылдың көктемінде кәсіпшілік балық аулауды тоқтату бойынша қалыптасқан жағдай балықшылардың, балық шаруашылығымен айналысатын елді-мекендер тұрғындарының әлеуметтік-экономикалық жағдайына айтарлықтай әсерін тигізген.
«Әлеуметтік және экономикалық тұрғыдан балық аулаудың маңыздылығын екенін ескере отырып, бірқатар депутаттар миграция маусымында балықтардың жиі кездесетін түрлерін аулауға құқықтық негіз беру және заңнамалық тұрғыда реттеу үшін «Жануарлар дүниесін қорғау, өсімін молайту және пайдалану туралы» ҚР Заңының кейбір баптарына өзгерістер мен толықтырулар енгізу бойынша ұсыныстарға бастамашы болды. Атап айтқанда, аталған Заңға толықтырулар енгізіліп, оған сәйкес ел Үкіметі тиісті ғылыми ұйымдар берген, мемлекеттік экологиялық сараптамадан өткізілуге тиіс биологиялық негіздемеге сүйене отырып жануарлар дүниесін, олардың бөліктері мен дериваттарын пайдалануға шектеу мен тыйым салуды енгізу, оларды пайдалану орындары мен мерзімдерін белгілеу туралы шешім қабылдайды. Алайда, аталған нормативтік құқықтық актілердің қабылдануы кешігуде», - дейді Сәрсенбай Еңсегенов.
Осыған орай, сенатор алдағы жылы республиканың балық шаруашылығы су айдындарында көктемгі балық аулау маусымының тоқтауына жол бермеу керектігін алға тартады. «Бұл үшін балық шаруашылығы субъектілеріне көктемде балық аулауға мүмкіндік беретін балық ресурстарын пайдалануға шектеулер мен тыйым салуларды реттейтін тиісті нормативтік құқықтық актіні қабылдауды тездету қажет», - дейді ол.