Алаяқтықты ұйымдастырушы Хюинь Тхи Хюен Ню өмір бойы абақтыда отыру жазасына кесілді. Оның қалған әріптестері бір жылдан жиырма жылға дейін бас бостандығынан айырылды.
Тергеу нәтижесіне қарағанда, Ню және VietinBank-тің өзге қызметкерлері несиелендіру ережелерін бұзып, өкілеттігін теріс пайдаланған. Сонымен қатар, олар мөрлер мен түрлі құжаттарды бұрмалап, мемлекетке вьетнамдық 4 триллион донг (200 млн. доллар) көлемінде залал келтірген.
VietinBank Вьетнамның мемлекеттік банкіне қарасты өнеркәсіп және сауда банкі болып табылады. Сарапшылардың пайымынша, VietinBank ісі елде банктік дағдарысқа алып келуі мүмкін.