Барак Обама 2009 жылғы Нобельдік бейбітшілік сыйлығының лауреаты атанды

АСТАНА. Қазанның 9-ы. ҚазАқпарат - 2009 жылғы Нобелдік бейбітшілік сыйлығы АҚШ президенті Барак Обамаға халықаралық дипломатияны және адамдар арасындағы ынтымақтастықты нығайтуға бірегей күш жұмсағаны үшін берілгенін Ослодағы Норвегия Нобельдік комитеті жұма күні жариялады.

Нобельдік бейбітшілік сыйлығының сомасы биылғы жылы 10 миллион швед кронын (миллион еуроға жуық) құрайды, деп хабарлайды ҚазАқпарат ресейлік «Жаңалықтар» агенттігіне сілтеме жасап.

Сыйлықты тапсыру салтанаты Ослода желтоқсанның 10-ында, сыйлықтың негізін қалаушы - швед өнертапқышы, өнеркәсіпшісі, лингвисі, философы және гуманисі Альфред Нобельдің (1833-1896) қайтыс болған күні өтеді.