Қазақстандық «Барыс» командасы Құрлықтық хоккей лигасындағы кезекті ойынын Ресейде «Витязь» (Подольск) командасына қарсы өткізді, деп хабарлайды ҚазАқпарат тілшісі.
Бүгінгі кездесуде екі команда жылдам гол соғу мүмкіндігін іздеді. Нәтижесінде 5-минутта елордалық клубтан Понтус Оберг есеп ашып кетті. Одан кейін 6-минутта «Витязь» сапынан Александр Яремчук таразы басын теңестірді.
Екінші кезеңде қазақстандық команда қайта алға шықты. Бұл жолы 21-минутта Кирилл Савицкий көздеген нысанадан мүлт кеткен жоқ. Ал 35-минутта ресейлік кдубтан Станислав Яровой тағы да есепті теңестірді.
Ойынның негізгі кезеңі 2:2 есебімен тең аяқталып, овертаймға ұласты. Онда ресейлік клубтың жолы болды.
Осылайша «Барыс» қатарынан бесінші ойында жеңіліс тапты.
Енді аталған клуб 9 қазанда елордада Ресейдің «Трактор» (Челябі) командасына қарсы ойын өткізеді.
Елордалық клуб бұдан бұрын қатарынан төртінші мәрте жеңілгенін жазған едік.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.