АСТАНА. KAZINFORM - Қазақстандық «Барыс» командасы бүгін, 3 қарашада Құрлықтық хоккей лигасындағы кезекті ойынын елордада Ресейдің «Нефтехимик» (Нижнекамск) командасына қарсы өткізді.
Фото: Виктор Федюнин / Kazinform
Кейінгі бес ойында қатарынан екі мәрте жеңіске жеткен елордалық клуб өткен турда Қытайдың «Куньлунь Ред Стар» командасына 1:2 есебімен жол берген еді. Сол олқылықтың орнын толтыру мақсатында олар бүгін жеңіске жетуге күш салды.
Фото: Виктор Федюнин / Kazinform
Дегенмен алғашқы болып ресейлік клуб есеп ашты. Бұл голды 18-минутта Вячеслав пещенко өзінің еншісіне жазды.
Екінші кезеңде елордалық клуб таразы басын теңестіруге ұмтылды. Ойынның 27-минутында Кирилл Савицкий дегеніне жетті.
Фото: Виктор Федюнин / Kazinform
Негізгі кезең 1:1 есебімен тең аяқталып, ойын овертаймға ұласты. Овертаймда жеңімпаз анықталған жоқ. Буллиттен «Барыстың» жолы болды.
Осылайша елордалық клуб қарсыласын буллитен 2:1 есебімен жеңіп, турнир кестесінде бір сатыға көтерілді. Қазір олар 22-орында тұр.
Фото: Виктор Федюнин / Kazinform
Енді қазақстандық команда бұдан кейінгі екі ойынын елордада өткізеді. Алдымен 5 қарашада ресейлік «Ак Барс» (Қазан) командасымен ойнаса, одан кейін 7 қарашада «Автомобилист» (Екатеринбург) клубымен шеберлік байқасады.
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.