АСТАНА. KAZINFORM – Елордалық «Барыс» клубы құрамынан бірқатар шетелдік ойыншылар кетті. Бұл жөнінде команданың баспасөз қызметі ресми түрде мәлім етті.
«Барыс» сапынан қорғаушы Натан Больё мен Уилл Бутчер, шабуылшы Майкл Маклауд қош айтысты. Үш хоккейші де команда құрамын жаз мезгілінде толықтырған еді.
Құрлықтық хоккей лигасында Натан Больё 8 ойында бір нәтижелі паспен көзге түссе, Уилл Бутчердің 15 ойында 3 нәтижелі пасы тіркелді.
Ал Майкл Маклауд 16 кездесуде 3 мәрте гол соқса, 3 мәрте әріптестеріне нәтижелі пас шығарып берді.
Айта кетсек, бұдан бұрын елордалық клуб ресейлік Даниил Апальков және беларусьтік Владислав Кодоламен келісім-шарт бұзылғанын хабарлады.
Еске салсақ, 17 қазанда «Барыс» хоккей командасының бас директоры қызметіне Нұрлан Оразбаев тағайындалды.
Сондай-ақ Ғалым Мәмбетәлиев «Барыс» командасына бас бапкер болып тағайындалды.
Енді елордалық клуб 19 қазанда Ресейде «Локомотив» (Ярославль) клубымен кездеседі.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.