АСТАНА. KAZINFORM - Қазақстандық «Барыс» командасы 28 желтоқсанда Құрлықтық хоккей лигасындағы кезекті ойынын Ресейдің «Торпедо» (Нижний Новгород) командасына қарсы өткізді.
Кездесу барысында қазақстандық команда белсенділігімен көзге түскен еді. Ойынның 1-минутында Станислав Бочаров мергендік танытты. Бірінші кезеңде қос команда тарапынан гол соғатын мүмкіндіктер болды. Дегенмен таблодағы есепке өзгеріс енген жоқ.
Екінші кезеңде ресейлік команда қатарынан үш шайба соғып кетті. Бұл голдарды Дмитрий Кагарлицкий 21, Василий Атанасов 25, Игорь Ларионов 30-минутта өзінің еншісіне жазды.
Осылайша «Барыс» қарсыласына 1:3 есебімен есе жіберді. Салдарынан қатарынан төртінші мәрте жеңілістің ащы дәмін татты.
Айта кетсек, елордалық клуб бұдан кейінгі бір ойынын сырт айдында өткізіп, 30 желтоқсанда Ресейдің «Cалават Юлаев» (Уфа) клубымен шеберлік байқасады.
Еске салсақ, бұдан бұрын «Барыс» елордада «Cибирьге» жеңіліп қалды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.