«Барыс» елордада «Локомотив» командасынан жеңіліп қалды

АСТАНА. ҚазАқпарат - «Барыс» Құрлықтық хоккей лигасындағы кезекті ойынын бүгін елордада Ресейдің «Локомотив» (Ярославль) командасына қарсы өткізді, деп хабарлайды ҚазАқпарат тілшісі.

Кездесу барысында командалардың белсенділігі байқалып тұрды.

Есепті алғашқы болып ресейлік клубтан 1-минутта Максим Осипов ашты. Ойынның 4-минутында «Барыс» хоккейшісі Михаил Рахманов таразы басын теңестірді.

Ал 7-минутта Павел Красковский «Локомотивті» алға шығарды.

Екінші кезеңнің 26-минутында Максим Осипов кездесудегі екінші шайбасын соқса, 27-минутта Сергей Андронов басымдықты арттыра түсті.

Оған 34-минутта қазақстандық командадан Дмитрий Шевченко бір шайбамен жауап қайырды.

Ойынның 44-минутында «Локомотив» хоккейшісі Степан Никулин мергендік танытса, қазақстандық Михаил Рахманов 47-минутта есеп айырмасын қысқартты.

Кездесуде «Барыс» қарсыласына 3:5 есебімен есе жіберді.

Ендң Құрлықтық хоккей лигасының тұрақты кезеңі мәресіне жетіп, плей-офф сатысы басталады. «Барыс» қазір турнир кестесінде 20-орынды місе тұтып, жарыстың аталған сатысына шығудан тыс қалды.

Еске салсақ, бұдан бұрын елордалық клуб «Барыс» Ресейде «Сибирь» (Новосібір) командасынан жеңіліп қалған еді.