АСТАНА. ҚазАқпарат - Құрлықтық хоккей лигасының (ҚХЛ) кезекті кездесуінде Астананың «Барысы» өз айдынында Санкт-Петербордың СКА командасын қабылдап, 1:4 есебімен ұтылып қалды, деп хабарлайды «ҚазАқпарат» тілшісі.
СКА биылғы маусымда жеңілістің дәмін татпаған, турнир кестесінде жеке-дара көш бастап келе жатқан команда. Бұл ойында да олар айқын басымдылығын көрсете білді. Бірінші кезеңде Сергей Калинин қос голдың авторы атанды. Содан кейін екінші кезеңде Патрик Херсли мен Александр Барабанов есепті 4:0-ге жеткізді. Тек соңғы кезеңде ғана «Барыстан» Кирилл Полохов есепті қысқарта алды.
Осылайша, биылғы маусымды сәтті бастап, сырт айдындарда жеңіске жеткен елордалықтар «Барыс-Аренадағы» бес кездесуінің төртеуінде жеңіліс тауып, Шығыс конференциясында жетінші орынға сырғыды. Евгений Корешковтың шәкірттері келесі ойынын 27 қыркүйек күні өз айдынында Батыс конференциясында үшінші орында келе жатқан «Локомотив» (Ярославль) командасымен өткізеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).