Бұған дейін елордалықтар соңғы төрт кездесуінде жеңіске жеткен еді.
«Торпедо» 36 ұпаймен Шығыс конференциясында жетінші орында келе жатса, «Барыс» 33 ұпаймен 9-сатыда тұрған-ды. Қос команданың да мақсаты плей-офф бәсекесіне шығуға мүмкіндік беретін үздік сегіздікке ілігу болатын.
Бұл жолы «Барыс» үшін ойын сәтсіз басталды. Бірінші кезеңде 11-минутта айдын иелерінің ойыншы алмасу кезіндегі қателігін пайдаланған Сергей Гончарук есеп ашты.
Матчтың екінші кезеңінде С.Гончаруктың әдемі пасынан кейін 23-минутта Михаил Варнаков есепті 2:0-ге жеткізді. 28-минутта Джастин Клус Хенрик Карлссонды қапы қалдырды – 3:0. Дегенмен 31-минутта сан басымдылығын пайдаланған Фил Бароне есепті қысқартты – 1:3. 38-минутта Ф.Бароне тағы бір мәрте мергендік танытты – 2:3.
Үшінші, шешуші кезеңде елордалықтар қаншама тырысқанымен, есеп өзгермей, «Торпедо» командасы жеңіске жетті – 3:2.
Енді елордалықтар қатарынан төрт матчын сырт айдында өткізеді. 13 желтоқсанда Юрий Михайлистің шәкірттері Челябіде жергілікті «Трактормен» күш сынасады.
Фото: www.hcbarys.kz