Құрлықтық хоккей лигасы аясында екі команда талай рет кездескен. Сол матчтардың басым бөлігінде «Трактордың» мерейі үстем болды. Жалпы, осы уақытқа дейін «Барыс» пен «Трактор» 18 рет бір-біріне қарсы ойнаған. Соның 11 матчы Челябі құрамасының пайдасына шешілген. Биылғы чемпионат аясында өткен алғашқы кездесуде де «Барыс» өз қарсыласынан 1:5 есебімен ұтылды. Ал қазіргі жалпытурнирлік кестеде Астана қаласының хоккей клубы «Тракторға» қарағанда, оқ бойы озық келеді. «Барыс» 32 матчта 64 ұпай жинап, 4-орынға шықса, «Трактор» 31 ойыннан кейін тек 44 ұпайға ғана қол жеткізген. Бұл команда 17-орында тұр.
Айта кетейік, бүгінгі ойын Астана уақыты бойынша кешкі сағат 19:00-де басталады. Оны «KAZsport» телеарнасы тікелей эфир арқылы көрсетеді.