Бас прокурор Алматының бизнес өкілдерімен кездесті
Кездесуге сондай-ақ Алматы қаласының әкімі Бауыржан Байбек, Алматы қаласының прокуроры Ғабит Миразов, сондай-ақ ұлттық компаниялардың, даму институттарының, екінші деңгейлі банктердің, Алматы кәсіпкерлер палатасының өкілдері мен аймақтық кеңес мүшелері, Индустриализациялау картасы, индустриалдық аймақ қатысушылары қатысты.
Бизнес-жұртшылық алдында сөз сөйлеген Бас прокурор Алматының ел экономикасының бестен бір бөлігін және республикалық бюджет түсімінің үштен бірін құрайтындығын ерекше атап өтті. Қазақстанның қаржылық нарығының 90 пайызы осы жерге шоғырланған.
Ел экономикасының базалық құрамдастарының бірі ретінде, кәсіпкерлікті дамытудың ерекше рөлін атап өткен Ж.Асанов, бизнесті қорғау мақсатында прокуратура қабылдап жатқан шаралар туралы айтты. Бас прокуратураның, «Атамекен» ҰКП-ның және «Нұр Отан» партиясы жанындағы РҚСЖҚІК-нің бірлескен жобасы - «Бизнесті прокурорлық қорғаудың» негізгі бағыттарына тоқталды. Елімізде жайлы бизнес-климат құру бойынша жүргізіліп жатқан жұмыстың нәтижелерімен бөлісті.
Жол картасы шеңберінде қабылданған жүйелі шаралар нәтижесінде қазірден бастап оң динамика байқалады.
Бас прокурордың сөзінше, СЭС пен ТЖ желісі бойынша тексерістердің 11 мың талабы жойылмақ. Адамдардың қауіпсіздігі мен денсаулығы үшін маңызды 3 мың талап қана қалады. Мемлекет басшысының тапсырмасын орындау шеңберінде әкімшілік процесті ізгілендіру бойынша мәселелер пысықталуда. Атап айтқанда, бизнес үшін әкімшілік айыппұлдарды 30%-ға төмендету жөніндегі ұсыныстар қазіргі уақытта Мәжілісте қаралуда. Экономикалық қылмыстар қозғаудағы тәсілдер өзгерілді. Қылмыстар тексерістер мен зиян актілері болған кезде ғана тіркеледі. Нәтижесінде қылмыстық істер 10 есеге азайды (Форумға дейін - 6 мың, кейін - 560).
2017 жылдың 1 шілдесінен бастап кәсіпкерлердің ұзаққа созылатын сот талқылаулары мен орасан зор шығындарсыз фискалдармен болатын дауларды шеше алатындығына назар аударылды. Ол үшін салық және кеден даулары бойынша сотқа дейінгі апелляция институты құрылды.
Өз сөзінде Жақып Асанов уәкілетті органдардың жұмысындағы жекелеген жүйелі кемшіліктерді, сондай-ақ проблемалы мәселелерді атады. Қарағанды қаласындағы тексерістер бойынша жұмыстың нәтижелері туралы айтты. Онда Бас прокуратура бригадасы бизнес өкілдерін қылмыстық процеске заңсыз тарту, заңсыз тексерістердің уақытылы жолын кесу бойынша шаралар қабылдамау, кәсіпкерлердің өтініштерін сапасыз қарау фактілерін анықтады.
Бас прокуратура электрондық форматқа, қылмыстық процесті жеңілдетуге және жеделдетуге көшуді ұсынады.
«Жедел қызметкерлер, тергеушілер немесе прокурорлар қылмыстық процесте өздерін қожайын сезінбеулері үшін, электрондық қылмыстық істі енгізетін боламыз. Бұл барлығы ашық болу үшін қажет. Кез келген уақытта не болып жатқанын бақылау және бұзылған құқықтың сұрауын талап ету үшін керек. Тергеп-тексеру мерзімдерін қысқартамыз, әсіресе айқын қылмыстар бойынша. Әлемнің өзге елдерінен көріп отырғаныздай, істерді біздегідей 3-5 айда емес 1-2 күнде аяқтайды», - деді бас Прокурор аймақ кәсіпкерлерімен кездесуде.
Қадағалау ведомствосының басшысы бизнесті қорғау мәселелері бойынша электрондық сервистерді дамытуды ұсынды. Жақын уақытта «Бизнес-тірегі» порталының мобильді қосымшасы іске қосылатын болады. Бас прокуратураның сайтында «Заңды бірге жақсартайық» атты арнайы формуляр бар, онда кәсіпкерлер бизнестің дамуына кедергі келтіретін нормаларды көрсете алады. Оның пікірінше, бизнес-қоғамдастықтар құқықтық базаны жақсартуға белсендірек қосылуы тиіс. «Бизнестің проблемаларын бизнесмендердің өздерінен артық білетін ешкім жоқ», - деп атап өтті Ж.Асанов.
Жақып Асанов Мемлекет басшысының Жолдауындағы негізгі бағыттар мен бағдарлар туралы айтты. Бұл - бизнесті дамыту, салық заңнамасын жеңілдету, бақылау-қадағалау функцияларына ауқымды тексерістер жүргізу.
Конституциялық реформаға жеке тоқталып өтті. Атап айтқанда, Конституцияның 26-бабына ұсынылып отырған түзетулерге қатысты пікірін білдірді. Ол түзетулердің шетелдіктерге жер беру мәселелерін көздемейтіндігін атап өтті. Жер мәселелері негізгі заңның 6-бабында бекітілген, және ол өзгертілмейді.