Баспасөз картасы не үшін керек – министрлік жауабы

АСТАНА. ҚазАқпарат – Ақпарат және қоғамдық даму вице-министрі Қанат Ысқақов «Масс-медиа» туралы жаңа заң жобасы аясында енгізілетін баспасөз картасы (пресс-карта) енгізудің себебін түсіндіріп берді, деп хабарлайды ҚазАқпарат тілшісі.

«Заң жобасындағы жаңашылдықтардың бірі - баспасөз картасы (пресс-карта) енгізу. Бұл бойынша қарсылық, түсініспеушілік туындады, мүмкін түсіндіру жұмыстары аздық еткен шығар. Баспасөз картасын енгізу журналистердің ақпарат алуына және таратуына ешқандай кедергі келтірмейді. Керісінше, карта - БАҚ өкілдерінің жұмысын ынталандырып, оңтайландыруға бағытталған құжат», - деді Қанат Ысқақов Мәжілісте «Масс-медиа» туралы заң жобасын талқылау барысында.

Вице-министрдің мәлімдеуінше, баспасөз картасын алмаған БАҚ өкілі жұмысын жалғастыра береді.

«Баспасөз картасын алу міндетті емес. Ол тілшілердің жұмысын шектемейді, тыйым салмайды. Карта енгізу - БАҚ өкілдерін аккредиттеу, олардың іс-шараларға қатысуы, мемлекеттік органдардың ғимаратына кіру процесін жеңілдететін құжат. Тағы бір жайт, баспасөз картасын біздің министрлік бермейді, оны үкіметтік емес ұйым береді», - дейді ол.

Айта кетейік, биыл елімізде журналистердің құқығы мен бостандығы туралы ұлттық баяндама әзірленбек.

Бұған дейін БАҚ және тілшілерді сотқа беру мерзімі 3 жылға дейін қысқаратыны туралы хабарлаған едік.