Батыс Қазақстан мектептерінде 126 мыңнан астам оқушы білім алады

ОРАЛ. KAZINFORM — Батыс Қазақстан облысында барлығы 379 мектеп жұмыс істейді.

БҚО білім басқармасының басшысы Елдос Сафуллиннің өңірлік коммуникациялар қызметі алаңында өткен брифингте мәлім еткеніндей, өңір мектептерінде 126 мыңнан астам оқушы білім алады. 

Елдос Набиоллаұлының сөзіне қарағанда, алдағы оқу жылына 1 сыныпқа 10,6 мың бала қабылданса, соның 76 пайызы қазақ тілінде оқитын болады. Қабылдау 31 тамызға дейін жалғасады.

- Жаңа оқу жылы қарсаңында жергілікті бюджет есебінен жалпыға бірдей білім беру қорынан оқушыларға қажетті құрал, киімдер алу үшін 8 208 балаға 46 мың теңгеден ата-анасының есеп-шоттарына барлығы 379,4 млн теңге аударылды. Сонымен қатар жыл сайын ұйымдастырылатын «Мектепке жол» акциясы аясында 700-ден астам жеткіншекке 10 млн теңгеге жуық көлемде кеңсе тауарлары, киім-кешек және қаржылай түрде демеушілік көмек көрсетілді, - деді Е.Сафуллин. 

Басқарма басшысының айтуынша, жаңа оқу жылына дейін «Қарашығанақ Петролиум Оперейтинг б.в.» компаниясының әлеуметтік жобалары аясында Казталов ауданы Қоныс ауылында 60 орындық пайдалануға берілмек. Сондай-ақ жыл соңына дейін «Келешек мектептері» аясында 6 мектеп құрылысы аяқталады. Оған қоса білім беру инфрақұрылымын дамыту қорының есебінен Оралда № 8 облыстық дарынды балаларға арналған мектеп ғимараты өз есігін айқара ашады.

Сондай-ақ облыс бойынша 6 білім беру нысанында күрделі жөндеу жұмыстары жүргізілуде.

Соның біреуі жаңа оқу жылына, қалған бесеуі жыл соңына дейін мәресіне жетеді. 

- Білім беру ұйымдарының материалдық базасын нығайту мақсатында биыл 23 кабинет жабдықтарын сатып алуға облыстық бюджет есебінен 299 млн теңге қарастырылды. Бұдан бөлек, «Қазақстан халқына» қоры есебінен 4 ауыл мектебінде 20 кабинет жабдықталып жатыр. Білім беру мекемелерін қауіпсіздік құралдарымен қамтамасыз ету мақсатында облыстық бюджеттен 304,3 млн теңге бөлініп, білім беру ұйымдары 100 пайыз қамтылды. Сондай-ақ жаңа оқу жылында оқушыларды оқулықтармен және оқу-әдістемелік кешендермен қамтамасыз ету үшін жергілікті бюджеттен 1 998,8 млн теңге берілді. Қазіргі таңда сатып алынған оқулықтарды мектептерге жеткізу жұмыстары жүргізілуде, - деп қосты Е.Сафуллин. 

Еске сала кетейік, бұдан бұрын Батыс Қазақстанда бірінші сыныпқа 12 мыңға жуық оқушы қабылданатынын жазған едік.