Батыс Қазақстан облысы сұйытылған газға деген қажеттілігін жаба бастады
ОРАЛ. KAZINFORM – Батыс Қазақстан облысы сұйытылған газға деген қажеттілігін жаба бастады. Бұл туралы Батыс Қазақстан облысының әкімі Нариман Төреғалиев Facebook-тегі парақшасында хабарлады.
Фото: БҚО әкімдігі
Нариман Төреғалиевтің мәлім еткеніндей, Мемлекет басшысының тапсырмасы аясында осыдан бір ай бұрын Батыс Қазақстан облысында Үкімет басшысының қатысуымен «Рожковское» газ кен орны іске қосылған болатын.
«Аталған іс-шара барысында БАҚ өкілдеріне сұхбат бергенімде, жаңа кен орны облысымыздың сұйытылған газға деген сұранысын жабатынын айтқан едім. Енді, міне, араға тура бір ай салып кен орнынан өндірілген 1 100 тонна сұйытылған газ облыс қажеттілігіне бөлінді. Ай сайын осындай көлемде өңірге cұйытылған газ жеткізіліп тұратын болады. 2024 жылдың соңына дейін кен орнында 4 ұңғыманы пайдалануға беру жоспарда бар. Осылайша, өндіріс қуатын арттырып, бұрынғыдай сұйытылған газды басқа облыстардан әкелуден арыламыз. Бұл – бірлескен еңбектің нәтижесі. Өндіріс орнында еңбек етіп жүрген газ саласының барлық қызметкеріне ризашылығымды білдіремін», - деп жазды БҚО әкімі.
Фото: БҚО әкімдігі
Еске сала кетейік, бұдан бұрын «Рожковское» газ конденсаты кен орны пайдалануға берілгенін жазған болатынбыз.
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).