ОРАЛ. KAZINFORM — Бұдан бұрын хабарланғанындай, Батыс Қазақстан облысы Теректі ауданы Подстепный ауылында бір оқушы екіншісіне пышақ сұғып алған болатын. Күдікті ұсталып, қылмыстық іс қозғалған еді.
БҚО білім басқармасының баспасөз қызметінен мәлім еткеніндей, зардап шеккен оқушы жазылып шығып, қазіргі кезде мектепте оқып жүр.
— Оқиға болған кезде мектепті директордың міндетін атқарушы басқарған еді. Кейін жаңадан директор тағайындалды. Оқушылармен жеке жұмыстар жүргізіліп келеді. Оларға ер мұғалім тәлімгер ретінде бекітілген, — деп хабарлады ведомстводан.
БҚО полиция департаменті баспасөз қызметінің мәліметінше, бүгінгі таңда қылмыстық іс өндірісте, тергеу амалдары жалғасып жатыр.
Еске сала кетейік, бұдан бұрын БҚО-да бір оқушы екіншісіне пышақ сұғып алғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).