Батыс Қазақстан облысында сүт өндірісі артып келеді
ОРАЛ. KAZINFORM — Жүзеге асырылып жатқан жобалардың арқасында өңірдегі сүтпен қамтылу деңгейі 22,3%-дан 36,8%-ға дейін артты, деп хабарлайды БҚО әкімдігінің баспасөз қызметі.
Батыс Қазақстан облысында ауыл шаруашылығы саласын дамыту бағытындағы жұмыстар аясында сүт-тауар фермаларының құрылысы мен кеңейтілуі белсенді жүргізіліп жатыр. Бұл шаралар «Агроөнеркәсіптік кешен саласындағы жобаларға кредит беру» мемлекеттік бағдарламасы арқылы іске асырылып жатыр.
2023 жылы осы бағдарлама аясында 1 900 басқа арналған 4 ірі сүт-тауар фермасын салуға және кеңейтуге бірқатар қаражат бөлінді. Қазіргі таңда осы жобалардың екеуі пайдалануға берілсе, қалған екеуінің құрылысы биылғы жылдың бірінші жартыжылдығында аяқталады деп күтіліп отыр.
Ал 2024 жылы тағы 3,8 миллиард теңге көлемінде бюджеттік несие қаражаты бөлініп, 400 басқа арналған жаңа сүт-тауар фермасының құрылысы қолға алынды. Бұған қосымша, жеке инвесторлардың бірі өз қаражатына осындай қуаттағы тағы бір ферманың құрылысын жүргізіп жатыр.
— Жүзеге асырылып жатқан бұл жобалар облыстың сүт өніміне деген ішкі қажеттілігін өтеуге елеулі үлес қосып келеді. Соның нәтижесінде өңірдегі сүтпен қамтылу деңгейі 22,3%-дан 36,8%-ға дейін артып, жылдық өндіріс көлемін 41,2 мың тоннаға дейін жеткізу жоспарланып отыр, — делінген әкімдік хабарламасында.
Бұған дейін БҚО-да қуаты 12 мегаватт болатын жаңа жылу электр турбинасы іске қосылғаны анықталды.