ОРАЛ. KAZINFORM — Кәмелетке толмағандардың құқық бұзушылықтарының алдын алу, олардың құқықтары мен заңды мүдделерін қорғау мақсатында БҚО аумағында 29 желтоқсан – 7 қаңтар аралығында «Демалыс» жедел-алдын алу іс-шарасы өткізілді.
БҚО полиция департаментінің баспасөз қызметі хабарлағандай, осы мерзімде 130 жасөспірім ішкі істер органдарына жеткізілген.
Соның ішінде 126-сы әкімшілік құқық бұзушылық әрекеттерге барған. Төртеуі қараусыз және бейберекет жүрген. Кәмелетке толмағандардың үшеуі бейімдеу орталығына орналастырылды.
— Іс-шара барысында барлығы 205 әкімшілік құқық бұзушылық анықталды. Соның 15-і ата-аналардың немесе заңды өкілдердің тәрбиелік міндеттерін орындамауы болса, 8 жасөспірім түнгі уақытта ойын-сауық орындарында қыдырған. 5 адам алкоголь өнімдерін сату талаптарын бұзған. Екеуі алкогольдік ішімдіктерді ішкен немесе қоғамдық орындарда мас болған. 176 жасөспірім түнгі уақытта заңды өкілсіз немесе тұрғынжайдан тыс жерде жүрген. Әлеуметтік жағдайы нашар 5 отбасы профилактикалық есепке қойылды. Бұрын осындай есепте тұрған 235 отбасы және тізімдік есептегі 155 кәмелетке толмаған тексерілді, — деп хабарлады ведомстводан.
Еске сала кетейік, бұдан бұрын БҚО-да жаңажылдық мерекелерге қатысты 362 нысан есепке алынғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).