Батыс Қазақстан облысында 4 адам жол апатынан көз жұмды, деп хабарлайды ҚазАқпарат тілшісі.
БҚО полиция департаментінің баспасөз қызметінен мәлім еткендей, оқиға 22 қыркүйек күні Бәйтерек ауданы аумағында болған.
«Сағат 12.00-де Орал-Кирсанов тас жолы бойында «ВАЗ-2112» және «Лада Гранта» автокөліктері бетпе-бет соқтығысты. Салдарынан қос автокөлік жүргізушісі мен «Лада Грантада» отырған 2 жолаушы алған жарақатынан оқиға орнында мерт болды. Сондай-ақ «Лада Гранта» көлігінің тағы бір жолаушысы ауруханаға жатқызылды. Қазір оқиғаның мән-жайы анықталып жатыр. Аталған дерек бойынша ҚР ҚК 345-бабы 4-бөлігіне (көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы) сәйкес сотқа дейінгі тергеу амалдары жүргізіліп жатыр», - деп хабарлады ведомстводан.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).