Батыс Қазақстанда 660-тан астам абонент жарықсыз қалып отыр, деп хабарлайды Kazinform.
БҚО энергетика және тұрғын үй-коммуналдық шаруашылық басқармасынан мәлім еткеніндей, 25 қараша күнгі жергілікті сағат 16.00-дегі мәлімет бойынша Орал қаласында, сондай-ақ Ақжайық, Тасқала, Казталов, Жаңақала, Сырым және Бәйтерек аудандарында жарықсыз отырған тұрғындар бар.
Бұлардың ең көбі Жаңақала (271 абонент) және Бәйтерек ауданында (204 абонент).
«Қазіргі кезде қалпына келтіру жұмыстарына 84 қызметкер 21 арнайы техникамен жұмылдырылған», - деп хабарлады ведомстводан.
Еске сала кетейік, бұдан бұрын Орал қаласында саяжай тұрғындары екі күн бойы жарықсыз қалғанын жазған болатынбыз.
Сондай-ақ Оралда ауа райына байланысты әуе кемелері кейінге шегерілді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).