ОРАЛ. KAZINFORM — Батыс Қазақстан облысында биылғы төрт айда жануарлардан зардап шеккен 817 адам медициналық көмекке жүгінді.
БҚО санитариялық-эпидемиологиялық бақылау департаменті басшысының орынбасары Нұрлыбек Мұстаевтың мәлім еткеніндей, олар жануарлардың тістеуі, тырналауы және сілекейі тиюі салдарынан жарақат алған. Бұлардың саны өткен жылғы осы кезеңдегіден (833) 16-ға кем.
Нұрлыбек Ермекұлының сөзіне қарағанда, соның ішінде 267-сі (2024 жылғы осы мерзімде — 255) — балалар.
Жарақат алғандардың 585-ін ит қапқан. 199-ы мысық, үшеуі жылқы, 10-ы ірі қара, 20-сы басқа жануарлардан зардап шеккен.
— Орал қаласы бойынша 558 адам (2024 жылы осы кезеңде — 607) медициналық көмекке жүгінсе, соның 174-і (183) — балалар. Бір адам ауруханаға жатқызылды. Облыста адамдар арасында құтырма ауруы тіркелген жоқ, — деді Нұрлыбек Мұстаев.
Еске сала кетейік, бұдан бұрын Оралда 10 жасар баланы ит қауып алғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).