ОРАЛ. KAZINFORM — Батыс Қазақстан облысында боран кезінде қойлардың қарға көміліп қалғаны жөнінде бейнежазба тарады.
Бейнежазбада адамдардың малды қардан аршып алып жатқаны көрінеді. Казталов ауданы әкімдігінен алынған мәліметке қарағанда, оқиға 14 желтоқсан күні Бірік ауылдық округіне қарасты Әжібай ауылынан 28 шақырым қашықтықта орналасқан Жұмыр қыстағында болды.
— Боран салдарынан қанша малдың шығынға ұшырағаны белгісіз. Қазіргі кезде олардың нақты саны анықталып жатыр. Мал «Қадырболат» шаруа қожалығына (басшысы Қуаныш Мұқашев) тиесілі, — деп хабарлады Казталов ауданы әкімдігінен.
Тұрғындардың сөзіне қарағанда, өңірде басқа да аудандарда бораннан кейін төрт түлік мал түгенделіп жатыр.
Еске сала кетейік, бұдан бұрын БҚО-да боранда жоғалып кеткен үш адамның денесі табылғанын жазған едік.
Сондай-ақ БҚО-да тағы бір ер адамның денесі табылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).