ОРАЛ. KAZINFORM — Батыс Қазақстан облысы Бөрлі ауданы аумағында Қазақстан станциясы – Пепел темір жол өткелінде жеңіл автокөліктің жүк пойызымен соқтығысқаны жөнінде әлеуметтік желіде бейнежазба тарады.
БҚО полиция департаменті баспасөз қызметінің нақтылауынша, оқиға 7 сәуір күні сағат 15:20-да реттелетін темір жол өткелінде болған.
Kia автокөлігі жүк пойызымен соқтығысты.
— Автокөліктің алдыңғы бөлігі түйіскен. Жол-көлік оқиғасынан зардап шеккендер жоқ. Аталған оқиғаға байланысты Бөрлі ауданы полиция бөлімімен Kia автокөлігінің жүргізушісіне жол ережесін бұзғаны үшін Әкімшілік құқық бұзушылық туралы кодексінің 610-бабына сәйкес хаттама толтырылды. Сондай-ақ «Қазақстан темір жолы» мекемесіне темір жол өткелінен пойыздың өтуі кезінде қауіпсіздікті қамтамасыз етпегені үшін ұсынысхат жіберілді, — деп хабарлады ведомстводан.
Еске сала кетейік, бұдан бұрын Оралда жеңіл көлік қағып кеткен әйелдің көз жұмғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).