ОРАЛ. KAZINFORM — Батыс Қазақстан облысы Теректі ауданы Дуана елді мекеніне баратын жолды қар суы бұзып кеткені жөнінде әлеуметтік желіде бейнежазба жарияланды.
Бейнежазбада ер адам аудандық маңызы бар Сарыөмір-Дуана жолдың үстімен еріген қар суының ағып жатқаны жөнінде айтады.
— Қар суы жолды 24 наурыз күні бұзып кетті. Бүгін, 25 наурызда ағыс бәсеңдеген, — дейді тұрғын.
Осыған орай Kazinform тілшісі Теректі ауданы әкімдігіне арнайы сауал жолдаған еді.
Аудан әкімінің орынбасары Дархан Абдрашитовтың мәлім еткеніндей, 24 наурыз күні дала қарының күрт еруіне байланысты Дуана ауылының кіреберіс жолының 3,5 шақырым бөлігінде су тасуы орын алды.
Еске сала кетейік, бұдан бұрын Батыс Қазақстанда еріген қар суы жолдың үстіне шығып кеткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).