Батыс Қазақстанда көмілген сібір жарасы ошағынан қауіп бар ма

ОРАЛ. KAZINFORM — Батыс Қазақстан облысында барлығы 222 сібір жарасы ошағы тіркелген. Қазіргі таңда бұл көмілген орыннан қауіп бар ма? Осыған орай Kazinform тілшісі БҚО ветеринария басқармасына арнайы сауал жолдаған еді.

БҚО ветеринария басқармасынан алынған мәліметке қарағанда, соның ішінде Орал қаласында 3 сібір жарасы көмілген ошақ болса, оның екеуі — Желаев, біреуі Деркөл кенті аумағында орналасқан. 

Бұл орындар мемлекеттік жер кадастры жүйесіне және топографиялық картаға енгізілген. 202 сібір жарасының орыны толық цемент-бетонды материалмен, 20-сы профильді қаңылтырмен қоршалған. Көмілген жердің бәріне «Сібір жарасы» тақтайшалары орнатылған.

— 2024 жылы қараша айында Казталов ауданы Қошанкөл ауылдық округінің Ордабай ауылында 1 бас ірі қара малынан сібір жарасы ауруы тіркелді. Биыл сібір жарасының ошақтары анықталған жоқ, эпизоотиялық жағдай тұрақты, — делінген ресми жауапта. 

БҚО санитариялық-эпидемиологиялық бақылау департаменті баспасөз қызметінің нақтылауынша, өткен жылы Ордабай ауылында ер адам ірі қара малды сою кезінде ауру жұқтырған. Науқас қаладағы ауруханада ем алып, үйіне қайтарылды.

— Эпидемиологиялық тергеу барысында науқастың ірі қара малды союға қатысқаны анықталды. Ветеринариялық қызметкерлермен бірлесіп санитариялық-эпидемиологиялық іс-шаралар толық көлемде жүргізілді, — дейді департамент мамандары.

Биыл бұл індет өңірде тіркелген жоқ.

Еске сала кетейік, бұдан бұрын БҚО-да ауыл тұрғынынан сібір жарасы анықталғанын жазған едік.