ОРАЛ. KAZINFORM — Батыс Қазақстан облысында Қаратөбе ауданы прокуратурасы білім беру ұйымдарының қызметкерлері зейнетке шыққан кезде заңның бұзылғанын анықтады.
БҚО прокуратурасының баспасөз қызметінен мәлім еткеніндей, ҚР Еңбек кодексінің 53-бабы 9-тармағына сәйкес қызметкер зейнеткерлік жасқа толғаннан кейін еңбек шартын бұзбас бұрын кемінде бір ай бұрын хабардар етіліп, өтемақы төленуі тиіс.
Алайда ауданның үш мектебінде 2024 жылы 5 педагог зейнеткерлік жасқа толуына байланысты өтемақы төленбестен жұмыстан шығарылған.
— Қаратөбе ауданы прокуратурасының араласуынан кейін ғана бес мұғалімге 400 мыңнан астам теңге көлемінде өтемақы төленді. Кінәлі мектеп директорлары тәртіптік жауапкершілікке тартылды, - деп хабарлады ведомстводан.
Еске сала кетейік, бұдан бұрын БҚО-да субсидия беру кезінде мемлекетке 7 миллиондай теңге шығын келтірілгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).