ОРАЛ. KAZINFORM – Батыс Қазақстан облысы Бөкей ордасы ауданында жол-көлік оқиғасы болды.
БҚО Полиция департаментінің баспасөз қызметінен мәлім еткеніндей, оқиға 1 желтоқсан күні кешкісін Өнеге-Бисен-Сайқын жолының 80-шақырымында болды.
- Шамамен сағат 18.58-де жүргізуші рульге ие бола алмай, «ВАЗ-21010» автокөлігінің аударылуына жол берген. Салдарынан өзі оқиға орнында көз жұмды. Осы көлікте отырған екінші ер адам түрлі жарақатпен аудандық ауруханаға жеткізілді. Қазіргі кезде сотқа дейінгі тергеу амалдары жүргізілуде. Сараптамалар тағайындалды, - деп хабарлады ведомстводан.
Бөкей ордасы аудандық ауруханасы дәрігерлерінің сөзіне қарағанда, ер адамның сынық жарақаты жоқ, бет, қолдарының терісі сыдырылған. Амбулаториялық ем алуға жіберілді.
Еске сала кетейік, бұдан бұрын Оралда мас күйінде аялдаманың терезесін сындырған ер адамның ұсталғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).