Батыс Қазақстанда жүк көлігі жанып кетті

ОРАЛ. KAZINFORM - Батыс Қазақстан облысында қырғызстандық азамат айдап келе жатқан жүк көлігі өртенді. 

БҚО ТЖ департаментінің баспасөз қызметінен мәлім еткеніндей, оқиға 18 сәуір күні Сырым ауданы аумағында болды.

Самара-Шымкент күре жолының 352-шақырымында жүк көлігінің тіркемесі мен кабинасы отқа оранған.

— Шаруашылық тауарлары мен тұрмыстық техника тиелген жүк көлігі Алматыдан Уфа қаласына бара жатқан. Зардап шеккендер жоқ. Қазіргі кезде оқиғаның мән-жайы, келтірілген шығын анықталып жатыр, — деп хабарлады ведомстводан.

Еске сала кетейік, бұдан бұрын Орал қаласында емханада өрт шыққанын жазған болатынбыз.