ОРАЛ. KAZINFORM — Қазақстандық паратаеквондошы Мәлік Мұқашев Оңтүстік Кореяның Муджу қаласында XI әлем чемпионатында топ жарды.
Спортшының бапкері Ербол Мерғалиевтің мәлім еткеніндей, паратаеквондодан аталмыш додаға әлемнің 50-ден астам елінен 250 спортшы қатысып, бақ сынады.
М.Мұқашев K-41 санаты бойынша 80 келі салмақ дәрежесінде өнер көрсетті.
Мәлік жартылай финалда түрік, соңғы бәсекеде ирак спортшысын ұтты.
Осылайша, Мәлік Мұқашев үш дүркін әлем чемпионы атанды. Ол бұған дейін 2021 жылы Ыстанбұлда (Түркия) және 2023 жылы Мексиканың Веракрус қаласында өткен әлем біріншілігінде топ жарған еді.
Еске сала кетейік, бұдан бұрын қазақстандық паратаеквондошының әлем чемпионы атанғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).