ОРАЛ. Қыркүйектің 12-сі. ҚазАқпарат /Ғайсағали Ералы/ - Қыркүйектің 11-інде Батыс Қазақстан облыстық қазақ драма театры өзінің ХVІІ маусымын белгілі драматург-ақын, Мемлекеттік сыйлықтың лауреаты Иран-Ғайыптың ( Иранбек Оразбаев ) «Махамбет» трагедиясымен ашты,
деп хабарлайды ҚазАқпарат тілшісі.
Аталмыш қойылымды кезінде елге танымал режиссер, Қазақстанның еңбек сіңірген әртісі Мұрат Ахманов сахналаған болатын.
Махамбет ролін Қуаныш Амандықов шығарса, Ербол Есендосов Исатай бейнесінде көрінеді. Теміржан Матаев - Жәңгір хан, Боранбай Молдабаев - Баймағамбет, Данияр Базарқұлов - Қайыпқали, ҚР еңбек сіңірген әртісі, Мемлекеттік сыйлықтың лауреаты Сердеш Қажымұратов Қарауылқожаны сомдады.
Театр директоры Құжырғали Төлеушевтің айтуынша, аталмыш өнер ұжымы жыл сайын маусымды осындай бірегей туындылармен ашуға бекініп отыр. Сонымен қатар театрда жаңа қойылымдар да әзірленуде.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).