ОРАЛ. ҚазАқпарат – Батыс Қазақстан облысында ауа райы бұзылып, республикалық жолда қозғалысқа шектеу қойылды, деп хабарлайды ҚазАқпарат тілшісі.
«Қазавтожол» ЖШС БҚО филиалының мәліметі бойынша 31 қаңтар күні жергілікті сағат 21.00-ден бастап республикалық маңызы бар Орал-Тасқала-РФ шекарасы (72-104 км, Тасқала
ауылынан Ресей шекарасына дейін) жолы барлық көлік түрлері үшін жабылды.
Жабылу себебі – күшті жел, боран, жолдың дұрыс көрінбеуі.
Сонымен қатар «Қазгидромет» РМК 1 ақпан күні БҚО-ның батысы мен солтүстігінде жаяу бұрқасын көтеріліп, көктайғақ болатынын хабарлады. Желдің жылдамдығы
секундына 15-20 метрге жетуі мүмкін. Облыстың оңтүстік-шығысында тұман түседі.
Орал қаласында да бұрқасын соғып, көктайғақ болуы ықтимал. Желдің екпіні секундына 18 метрге дейін жетеді.
Осыған байланысты БҚО ТЖ департаменті ескерту жариялап, тұрғындарға сақ болу, алыс жолға шықпау керектігін жеткізді.
Еске сала кетейік, бұдан бұрын Батыс Қазақстанда боранға байланысты жолдар жабылғанын жазған болатынбыз.
Сондай-ақ Батыс Қазақстан облысында жол апатынан екі адам қаза тапты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).