ОРАЛ. 1 желтоқсан. ҚазАқпарат - Жыл сайын ҚР Білім және ғылым министрлігі Балалар құқықтарын қорғау комитетінің бастамасымен Қазақстанның барлық аймақтарында балалардың қоғамдық тыңдаулары өтеді. Биылғы қоғамдық тыңдаулар тұңғыш Президент күніне орайластырылып отыр.
Облыстық балалар құқығын қорғау департаментінен түскен мәліметке қарағанда, аталмыш іс-шараның мақсаты - өскелең ұрпақтың әлеуметтік-құқықтық белсенділігін арттыру, азаматтық ұстанымын дамыту.
Қоғамдық тыңдауларға жобалардың авторы болып табылатын білім беру ұйымдарының оқушылары, жергілікті атқарушы және өзін-өзі басқарушы билік органдарының өкілдері, педагогтар, ата-аналар қатыса алады.
Батыс Қазақстан облысында тыңдаулар екі кезеңде - 1 желтоқсан мен 25 ақпан аралығында аудандық және 1 наурыз бен 10 сәуір аралығында қалалық кезеңде өтеді. Қоғамдық тыңдаулар Бөрлі ауданының Аксай қаласында өтетін облыстық «Балалық шақ құқығы» форумында қорытындыланады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).