Батыс Қазақстанда бес бірдей мектеп бой көтермек

ОРАЛ. ҚазАқпарат - Батыс Қазақстан облысының әкімі Алтай Көлгінов Оралға қарасты Зачаган және Деркөл кенттерінде салынғалы жатқан жаңа екі мектептің іргетасын қалауға қатысты, деп хабарлайды ҚазАқпарат.

Деркөлде 600 орындық мектеп құрылысын «Алтим» құрылыс фирмасы» ЖШС жүргізбекші. Компания басшысы Геннадий Стародубцевтің сөзіне қарағанда, мектеп ғимараты жеті қос қабатты және екі үш қабатты бөліктерден тұрмақ. Оларда сынып бөлмелері, спорт залы, асхана және басқа кабинеттер орналасатын болады. Биылғы үшінші тоқсанда басталған мектеп құрылысын келесі жылы осы мерзімде бітіру көзделуде.

 

Өңір басшысының айтуынша, бұл мектеп құрылысына Ұлттық қордан 1250 млн. теңге бөлінген. Үкімет пен Білім және ғылым министрлігінің қолдауымен облыста бес мектеп салу жоспарланса, соның екеуінің іргесі қаланды. Алдағы жылы тағы екі мектеп Оралда бой көтерсе, соның біреуі апаттық жағдайда, қазір бос тұрған №4 орта мектептің орнына тұрғызылады. Тағы бір білім ордасы алдағы жылы Зеленов ауданы Дариян ауылында салынбақшы. Биылдың өзінде облыста үш балабақша, бірнеше мектеп пайдалануға берілді. Бұл ел тәуелсіздігінің 25 жылдығы қарсаңында өңір үшін үлкен қолдау болды. Құрылысқа қаржы республикалық және жергілікті бюджеттен, сондай-ақ «ҚПО б.в.» компаниясы есебінен берілуде.
 

Зачаган кентінің «Сарытау» шағынауданында мердігер ұйым «СВ плюс» ЖШС қолға алған 900 орындық мектеп құрылысы 1888,14 млн. теңгеге бағаланған.  Түрлі қабатты, тоғыз бөліктен тұратын ғимарат аумағында алғашқы әскери дайындық, дене шынықтыру-спорт орындары, демалыс орындары қарастырылған. Бұл жоба да бір жылға есептелген.

Облыс орталығында халық санының көбеюіне байланысты осылайша жаңа білім ошақтары бой көтеруде.