Батыс Қазақстанда бір апта ішінде 38 өрт оқиғасы орын алды

ОРАЛ. Мамырдың 6-сы. ҚазАқпарат /Ғайсағали Ералы/ - Батыс Қазақстан облысында сәуірдің 29-ы мен мамырдың 5-і аралығында 38 өрт тіркелді.

Облыстық төтенше жағдайлар департаментінің баспасөз қызметінен ҚазАқпарат тілшісіне хабарлағанындай, мұның көпшілігін құрғақ шөптің жануы мен тұрғындар ауласындағы қосалқы шаруашылықтардың өртенуі құрайды. Мұндай оқиғалар негізінен Теректі, Ақжайық, Бөрлі, Зеленов және Жәнібек аудандарында орын алып отыр. Мамырдың 4-інде Оралдағы «Мерей» сауда орталығында орын тепкен вагон-дәмхана отқа оранды. Өртенген аумақ 50 шаршы метрді құрады. Сондай-ақ Теректі ауданы Федоров ауылында бір үйдің 15 шаршы метр қосалқы шаруашылығы өртеніп, үш текше метр отыны жанып кетті. Осындай оқиға Зеленов ауданы Новенький ауылында да орын алып, дүңгіршек пен киім-кешек отқа кетті. Қазіргі кезде өрт оқиғаларының себептері анықталуда.