Батыс Қазақстанда «Бірлігіміз жарасқан» акциясы аясында қайырымдылық шаралары ұйымдастырылуда
Облыстық ішкі саясат басқармасының бас маманы Әлібек Молданиязовтың айтуынша, «БҚО азаматтық альянсы» заңды тұлғалар бірлестігі (төрайымы Айгүл Түркина) аталмыш істі үш бағытта қолға алып отыр. Атап айтқанда, мүгедектер арасында спорттық шаралар өткізеді. Сондай-ақ қамкөңіл жандарға, жалғызілікті қарияларға қайырымдылық көрсетумен қатар экологиялық іс-шараларды ұйымдастырады.
Таяуда Қазақ саңыраулар қоғамы Орал оқу-өндірістік кәсіпорнымен бірлесіп осында көп жылдан бері абыройлы еңбек етіп келе жатқан қызметкерлерге арналып дастархан жайылып, құрмет көрсетілді. Аталмыш кәсіпорын директоры Мәлік Көбейсінов Татьяна Грицай, Ирина Конюх, Балсұлу Шыналиева, Тойған Ғабдуллина сынды жандардың қандай қиын кезеңде де қажырлы жұмыс жасағанын атап өтті. Оларға алғысхаттар, сыйлықтар табыс етілді.