ОРАЛ. ҚазАқпарат – Батыс Қазақстан облысында боранға байланысты Самара – Шымкент жолы жабылды, деп хабарлайды ҚазАқпарат тілшісі.
«ҚазАвтоЖол» ЖШС БҚО филиалының мәліметі бойынша 16 наурыз күні жергілікті сағат 08.00-ден бастап ауа райының нашарлауына байланысты республикалық маңызы бар Самара-Шымкент (266-394 км, Подстепный ауылынан Жымпитыға дейін) жолында барлық көлік түрлері үшін қозғалысқа шектеу қойылды.
Жабылу себебі – боран, жолдың нашар көрінуі.
Бұдан бұрын дәл осындай себеппен түнгі сағат 00.00-ден аталмыш жолдың Жымпитыдан Ақтөбе облысына дейінгі аралығы (394-525 км) жабылған еді.
Осыған байланысты БҚО ТЖ департаменті аталған бағытта тұрғындарға жолға шықпау керектігін жеткізді.
Сонымен қатар сағат 08.30-ден бастап республикалық маңызы бар Орал-Атырау, Подстепный-Федоров-РФ шекарасы, Орал-Тасқала-РФ шекарасы жолдарында да қозғалысқа шектеу қойылды.
Еске сала кетейік, бұдан бұрын Батыс Қазақстанда республикалық жолдарда көлік қозғалысына тыйым салынғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).