Батыс Қазақстанда дала өрті басылмай тұр
Облыстық төтенше жағдайлар департаментінен ҚазАқпарат тілшісіне хабарлағанындай, Қазталов ауданы орталығында Б.Нығметов деген азаматқа тиесілі 10 тонна пішен жанып кетті, сондай-ақ 72 шаршы метрді шарпыған өрт 19 метр аула қоршауын да сау қалдырмады. Сол күні осы ауданның Жалпақтал ауылында К.Сәрсеновтің қора-қопсысы отқа оранды. Бұл екі оқиғаның себеп-салдары, келген шығын, кінәлілер анықталуда.
Сондай-ақ «тілсіз жаудан» Орал қаласының маңы да аман қалмады. Қалаға қарасты Серебряков кенті маңында 30 және 35 гектар жердің құрғақ шөбі өртенсе, №1 училише, құс фабрикасы, бірінші және екінші саяжай, Бортау, Желтау, Зеленов ауданы «Асан» агрофирмасы, Теректі ауданы Шаған ауылдық округінің Социализм елді мекені, Ақсай қаласы Жастық көшесі маңындағы осындай жерлер де отқа ілікті. Соның салдарынан көк түтін исі кеше Орал қаласына да жетті.